Sòhẹntọ lẹ fìn tòvi Turkey tọn de po mẹdevo de po to Abuja

Sọn Wikilinlin

Sibigbe, Nuwhàsun 6, 2023

Erdogan Guler he yin tòvi Turkey tọn owhe 52-mẹvi de po mẹdevo he mí ma ko yọnẹn de po ko yin fìnfìn gbọn sòhẹntọ atọ̀n delẹ dali to lẹdo Kubwa tọn mẹ to Abuja.

Linlin lẹ dohia dọ nujijọ lọ wá aimẹ to ogàn ṣinawe whèjai tọn mẹ to Azangaagbe, Nuwhàsun 3, 2023, podọ yé jẹwhẹ nujijọ lọ tọn to ponọpa Byazhin tọn mẹ to Abuja.

Ponọ he yin asisa nudọnamẹ lọ tọn lẹ, he dọ nujijọ lọ na linlinnamẹtọ lẹ dọdọ, "Dawe whlẹpatọ de, Babagana Usman, na nudọnamẹ lọ dọ to nudi ogàn ṣinawe whèjai to Azangaagbe, Nuwhàsun 3, 2023, sòhẹntọ atọ̀n he to mọto Toyota Prado SUV de mẹ fìn jonọ de he yin azọ́nwatọgbẹ́ emitọn, Erdogan Guler, he yin tòvi Turkey tọn po mẹdevo de he mí ma ko yọn yinkọ etọn po fie e nọ nọ̀ po, to owhe Guler tọn gbe to Leaner Estate, Brickcity, Kubwa.”

Asisa nudọnamẹ lọ tọn yidogọ dọ mẹfintọ lọ lẹ sọgan to azọ́nwa hẹ amẹ́ de he sẹpọ bosọ yọ́n yigọyigọ Guler tọn lẹ.

Asisa nudọnamẹ lọ tọn sọ yidogọ dọdọ, "Ponọ he nọ hòavùn sọta mẹfinfin lẹ to dodinnanu basi gando nujijọ lọ go podọ ponọ lẹ to nuhe go yé pe lẹ wà nado whlẹn mẹhe yin fìnfìn lọ lẹ bo wle danuwatọ lọ lẹ."

To whenue hoyidọtọ ponọ lẹ tọn to FCT, Josephine Adeh, yin hokanse gando nujijọ lọ go, e dọdọ emi ma to tòmẹ, dọ emi tọ́nwhẹ̀n.

"Podọ n'ma ko se nudepope gando whẹho ẹnẹ go, ṣigba n'na kanse bo dike mì ni yọnẹn to enẹgodo," wẹ Adeh yidogọ.

Asisa lẹ[jlado | jla asisado]

Gọẹ yi sọn "https://guw.wikinews.org/w/index.php?title=Sòhẹntọ_lẹ_fìn_tòvi_Turkey_tọn_de_po_mẹdevo_de_po_to_Abuja&oldid=17126"