Ponọ lẹ wle omẹ awe delẹ to Ondo na e yin didọ dọ yé dlan zannu do hunkuntọ de kaka e do kú wutu

Sọn Wikilinlin

Yọnnuzagbe, Lidosun 13, 2023

noicon
Icon of loudspeaker
Hoyido-kanji ehe yin bibasi sọn vọjlado nukinkan tọn mẹ he yin bibasi to 13-04-2023, enẹwutu e ma sọgan dó vọjlado dìn tọn hia todin.

Ponọ ayimatẹn Ondo tọn lẹ ko dọ to Oguzangbe dọ yé ko wlé omẹ awè he yè sawhẹ̀dokọna dọ yé dlan zannu do Olorunfemi Tope, dawe owhe gban-atọ́n mẹvi de, kaka bọ e ku.

The PUNCH na linlin to Tẹnigbe dọ Tope yin huhu gbọn gbẹtọgun he to adán ji de dali na e kùn mọto po yamakinanu po bọ enẹ dekọtọn do asidán he jọ to lẹdo Ijoka tọn mẹ to Akure, he yin tatọ-tònọ ayimatẹn lọ tọn mẹ.

Asidán lọ dekọtọn do oku mẹ na omẹ awè bọ omẹ ṣidopo gbleawu.

Gbẹtọgun he to adán ji lọ hò Tope bosọ dlan zannu do e kaka bọ e ku, enẹgodo yé domiyọ́n mọto etọn.

Hoyidọtọ Ponọ ayimatẹn lọ tọn lẹ tọn, SP Olufunmilayo Odunlami, dọ to tito ladio ji tọn de whenu to Oguzangbe dọ, ponọ lẹ ko wlé omẹ awè na adà he yé yiwa to whẹ̀dida jogbe he yin hinhẹn ṣẹ do Tope ji lọ wutu.

Tito ladio ji tọn lọ, he yin nukúnpedego gbọn Azọ́nwatọ linlinwhe NAN Akure tọn de dali, dohia dọ Odunlami dọ dọ dopo to mẹhe yin wiwle lọ lẹ mẹ wẹ de linlẹn lọ tọ́n dọ yè ni fiọ mọto Tope tọn.

Hoyidọtọ ponọ̀ lẹ tọn lọ dọ dọ omẹ lọ lẹ na yin hinhẹn yì owhẹ̀ nukọ̀n na owhẹ̀ mẹhuhu tọn po miyọ́n didó nutindo mẹdevo tọn po, e sọ vẹvẹ na mẹlẹpo dọ yé ni ma nọ ze whẹ̀dida do alọ̀ yedetiti tọn mẹ gbede blo.

"Mí dona nọ pọ́n mídelẹ di omẹ dopolọ bosọ nọ yinwanna mide. Tintan whẹ́, mí dona nọ mọdọ gbẹtọ wẹ mí yin jẹnukọn whẹpo do wá lẹzun zemijànnọ, ponọ, kavi alọnuzọ́nwatọ devo depope.

"To alọnu din, mí ma ko gán dọ po nujikudo po dọ mẹhe ku lọ yin alọ̀slonamẹtọ intẹnẹt ji tọn de gba.

"kakati mẹhe to finẹ lẹ ni gọalọ to whenue asidán lọ jọ, mẹdelẹ de whẹ̀dida jogbe gbọn dẹpẹ lọ huhu dali, bosọ fiọ mọto etọn.

"Mí dona nọ dapana mahẹ tintindo to whẹ̀dida jogbe hinhẹn ṣẹ mẹ, gbẹkọ̀ yèdọ-yèdọ lẹ go bosọ nọ na linlin nujijọ lẹ tọn to ponọpa he to yakẹ mẹ na jijọho nido tin to lẹdo mítọn lẹ mẹ", wẹ e dọ.

Asisa lẹ[jlado | jla asisado]

Gọẹ yi sọn "https://guw.wikinews.org/w/index.php?title=Ponọ_lẹ_wle_omẹ_awe_delẹ_to_Ondo_na_e_yin_didọ_dọ_yé_dlan_zannu_do_hunkuntọ_de_kaka_e_do_kú_wutu&oldid=13576"