Nawe hohonọ owhe 30-mẹvi de yin wiwle na e sọ́hì viyọnnu jọja vito-mẹde etọn wutu

Sọn Wikilinlin

Tẹnigbe, Nuwhàsun 22, 2023

Eucheria Ndigwe, he yin nawe owhe 30-mẹvi he yin hohonọ de, to gànmẹ to alọnu na e yin whẹsadokọna dọ e sọ́hì Chinaze Aneme, he yin viyọnnu jọja vito-mẹde etọn de, to ayimatẹn Awọnlin tọn, na e ma yàn saki etọn na ẹn wutu.

Ponọ lẹ wle nawe lọ to whenue video he dopo to kọmẹnu etọn lẹ yì to nujijọ lọ whenu nado do lẹblanu hia ovi lọ wá gbàpe to intẹnẹt ji to sẹfifo godo.

Benjamin Hundeyin, he yin nukunmọnu ponọ lẹ tọn to ayimatẹn lọ mẹ, yigbe dọ yé wle e nugbo, to nuhe e kàn do Twitter ji to Sẹgbe mẹ.

Hundeyin dehia dọdọ na ninọmẹ etọn wutu, mẹhe yin whẹsadokọna lọ ko yin tẹnsẹna yì fie e na to nukunpedomẹgo mọyí te to ponọpa lọ mẹ to whenue dodinnanu lẹ to yìyì to alọnu.

E dọdọ viyọnnu lọ lọsu to yinyin nukunpedego to dotowhe ponọpa lọ tọn mẹ.

Lẹdogbedevomẹ nuhe e kàn tọn die, "Eucheria Ndigwe, yèdọ nawe he yin whẹsadokọna lọ, he sọ yin owhe 30-mẹvi de yin wiwle to osọ he wayi. Na whẹwhinwhẹn lọ dọ e to ohò wutu, e yin tẹnsẹna yì adà yọnnu lẹ tọn he ko yin vivọjlado to agọe mẹ, to fie po alọgọ @Lagosdsva tọn po, e na mọ nukunpedomẹgo he pe yí te to whenue dodinnanu lẹ to yinyin bibasi."

"Viyọnnu lọ to yinyin nukunpedego ganji to dotowhe ponọ lẹ tọn (@medical_police), to Ikeja."

Asisa lẹ[jlado | jla asisado]

Gọẹ yi sọn "https://guw.wikinews.org/w/index.php?title=Nawe_hohonọ_owhe_30-mẹvi_de_yin_wiwle_na_e_sọ́hì_viyọnnu_jọja_vito-mẹde_etọn_wutu&oldid=17980"