Man United lẹkọ sọn gúgú mẹ nado gbawhàn Real Betis tọn podo agó 4-1 po

Sibigbe, Whejisun 11, 2023

Manchester United lẹkọ sọn gúgú daho ylankan de mẹ to whenuhó ogbẹ́ lọ tọn mẹ gbọn Liverpool dali nado hò Real Betis 4-1 to agbàwhinwlẹn tintan yetọn whenu to adà bọlu-hògbẹ́ 16 he gbọngodo lẹ tọn to Europa League mẹ.

United gú to alihò daho de mẹ sọn 1931 gbọn ehe ye ko tindo numimọ mọnkọntọn dile ye gú podo agó 7-0 po to Anfield to Sẹgbe.

Erik ten Hag do vivẹnu nado jla nujijọ ylankan lọ do gbọn zinzán bọlu-hòtọ he gú lọ lẹ nado gbawhàn to ojlẹ ehe mẹ.

Marcus Rashford wẹ ze ogbẹ́ lo do nukọn to bẹjẹeji aihun lọ tọn whenu podo agó 26tọ etọn to owhe ehe mẹ ṣigba Betis fli agó lọ lẹkọ dile Ayoze Perez gbá ṣọti nado do agó.

Betis lẹ sọgan ko jẹ nukọn whẹpo adà tintan aihun lọ tọn fó wa vivọnu to whenuena bọlu he Perez gbá bli gbọn aga na goli lọ.

Ṣigba bọlu-hòtọ nukundeji United tọn awe he to azọ́nwa ganji to agọe lẹ mẹ wẹ hẹn diọdo dagbe wa na ogbẹ́ lọ to gbọjẹ godo.

Antony do agó podo ṣọti dagbe de po whẹpo Bruno Fernandes ehe Ten Hag yi do basi nukọntọ to aihun lọ mẹ na ogbẹ́ etọn do do agó podo ota po sọn alọgọ Luke Shaw tọn po.

Wout Weghorst do agó awetọ etọn na bọlu-hògbẹ́ lọ to aihun 15tọ etọn na United to nukunwhiwhe ṣidopotọ he po na aihun lọ nido wa vivọnu mẹ.

Asisa lẹ

• Man United bounce back, thrash Real Betis 4-1". — Vanguard. March 9, 2023
• Ron Walker. "Man Utd 4-1 Real Betis: Marcus Rashford, Antony, Bruno Fernandes and Wout Weghorst on target as Utd secure big first-leg lead". — Skysports. March 10, 2023