Mẹfinzetọ de to Awọnlin he to ofligọ-kuẹ Naira livi 20 biọ yin hùhù bọ omẹ he yin fìnfìnze lẹ yin tuntundote

Sẹgbe, Lidosun 9, 2023

Dawe de he yè sawhẹ̀ mẹfinfin tọn dokọna de ko hẹn ogbẹ̀ etọn bu to whenue ewọ po ponọ̀ delẹ po desò do yede to lẹdo Ikorodu tọn mẹ to Ayimatẹn Awọnlin tọn mẹ to Yọnnuzagbe.

Ponọ̀ lọ lẹ sọ whlẹn omẹ awè he mẹfintọ lọ lẹ họ̀njodo do fiwhiwhlá yetọn lẹ mẹ to lẹdo lọ mẹ lẹ gan to whenue yé diahi hẹ mẹfintọ lọ lẹ.

Linlinwe City Round tọn sè dọ dawe he ku lọ po hagbẹ etọn lẹ po ko fìn mẹdelẹ ze to whenue yé wá gbanu to okọ́ lọ mẹ to azan koatọ́n-nukundopotọ Whejisun tọn mẹ.

Mí sè dọ, to whenue yé ko fìn mẹlo lẹ sọyi godo, dawe lọ lẹ wá ylọ hẹnnumẹ mẹhe yé fin lọ lẹ tọn lẹ bo biọ Naira livi 20 to yé si nado jó yé.

To whenue Hoyidọtọ Ponọ̀ Ayimatẹn lọ tọn lẹ tọn, SP Benjamin Hundeyin, to hodọ gando nujijọ lọ go, e dọ dọ ponọ lọ lẹ lọsu desò do jaguda lọ lẹ, bo yidogọ dọ dile yé to odò de do yede, dopo to ponọ̀ lọ lẹ mẹ desò do dopo to yé mẹ bọ e ku, yé sọ whlẹn omẹ awè he yin finfin gan.

Hundeyin dọmọ, "Mọwẹ, nugbo wẹ dọ nujijọ lọ jọ. Omẹ awè yin whiwhlẹngan bọ dopo to jaguda lọ lẹ mẹ yin huhu to whenue yewlẹ po ponọ lẹ po desò do yede.

"Nue jọ lọ wẹ yindọ mẹfintọ lọ lẹ wlé omẹ lọ lẹ sọn azan koatọ́n-nukundopotọ Whejisun tọn gbọ́n bo biọ Naira livi 20 whẹpo na do jó ye, amọ́ hẹnnumẹ omẹ lọ lẹ tọn dọhó hẹ yé bọ yé kọngbedopọ do livi 3 ji.

"Todin, hẹnnumẹ lọ lẹ dọna ponọ lẹ to afọdopolọji bọ dodinnanu bẹjẹeji whladopo lọ.

"To azán he ji yé kọngbedopọ do lọ to azan ẹnẹtọ Lidosun tọn, mẹfintọ lọ lẹ tọpọwu do gbẹmẹ to whenue ye mọ ponọ lẹ podọ ponọ lọ lẹ dli do yé ji bo hù dopo to yé mẹ, bọ mẹhe po lẹ doge wezun mẹ. Mí whlẹn omẹ awè gan to enẹ godo".

Asisa lẹ

• Deji Lambo. "Lagos kidnapper demanding N20m ransom shot dead, captives freed". — Punch. April 8, 2023
• "Nigerian Police Bust Kidnappers’ Den In Lagos, Rescue Two Victims, Kill Suspect". — Sahara Reporters. April 7, 2023