Jọja Anambra tọn he to homẹgble ji delẹ domiyọ́n omẹ atọ́n he yin nuvẹdo dọ ye yin jaguda lẹ

Oguzangbe, Whejisun 28, 2023

To Sibigbe, gbẹtọgun he to adánji de fiọ omẹ atọ́n he yè vẹnudo dọ yé yin jaguda lẹ to Nkpor, sẹpọ Onitsha to ayimatẹn Anambra tọn mẹ.

Eyin didọ dọ, jaguda he yè vẹnudo lọ lẹ yin fifiọ to whenue yé gbọawupo nado fin alokan apomẹ tọn sọn mẹhe juwajei lẹ si to lẹdo lọ mẹ.

Mẹhe yin kunnudetọ nujijọ lọ tọn dọna linlinwe Punch Metro tọn to Sẹgbe dọmọ, mẹhe yin nuvẹdo lọ lẹ nọ saba zan kẹkẹ afọ-atọ̀nnọ de do fin alokan lẹ, sẹgẹ lẹ, akuẹ po nutindo vonọtaun lẹ po to lẹdo lọ mẹ.

Asisa de he ma jlo dọ yinkọ etọn ni yin zinzinjẹgbonu na whẹho hihọ tọn delẹ wutu, dọmọ, mẹhe yin nuvẹdo lọ lẹ ko to budona mẹlẹ to lẹdo lọ mẹ, e nọzan pẹẹde.

Video de yin didohia gando nujijọ lọ go he do whenue mẹhe yin nuvẹdo lọ gbẹ to yiyi pe to miyọ́n lọ mẹ bọ gbẹtọ lẹ sọ lẹdo ye bosọ to nudlan do yé bọ hagbẹ etọn lẹ lọsu to fifiọ to miyọ́n lọ mẹ.

To Sẹgbe, whenue mẹhe yin Ponọ-gán hodọdopọ azọ́nwhé tọn, DSP Tochukwu Ikenga se ehe, e jẹagọdo walọ mọnkọ bo na tuli mẹlẹ dọ dọ, whedepopenu he alọ jẹ mẹhe yé vẹnudo dọ e yin jaguda de go, yé ni wle sọyi ponọpámẹ, na enẹ na gọalọ na hihọbasinamẹtọ lẹ lọsu.

Mahopọnna enẹ, Ikenga dọmọ, alokan apomẹ tọn voovo atọ́n po kẹkẹ afọ̀-atọ̀nnọ dopo po yin mimọ to nujijọ lọ tẹnmẹ he sọgan ko yin finfin gbọn jaguda lọ lẹ dali.

E dọmọ, "Whẹpo ponọ lẹ do jẹ nujijọ lọ tẹnmẹ to ogan 5.30 whejai tọn mẹ, yé ko domiyọ́n mẹhe yin nuvẹdo lọ lẹ. Finẹ lọ wẹ ponọ lẹ mọ alokan apomẹ tọn voovo atọ́n po kẹkẹ afọ̀-atọ̀nnọ dopo te he sọgan ko yin finfin gbọn jaguda lọ lẹ he yin fifiọ dali.

Asisa lẹ

• Ikenna Obianeri. "Angry Anambra youths set five robbery suspects on fire". — Punch. 27th March 2023

• Joe Chukindi. "Anambra police confirm burning to death of five suspected robbers". — Punch. March 26, 2023