Gufọntọ lẹ hù dawe owhe 70 mẹvi de bo sọ fiọ ohọ̀ kande ko-nukunẹnẹ to Bauchi

Sọn Wikilinlin

Ahọluzangbe, Lidosun 21, 2023

Dawe owhe kande-gban mẹvi de yin hùhù to Sibigbe to hunyanhunyan he fọndote to glètoho Sang tọn mẹ to Lẹdo Gandudu Dokọ̀ tọn Bogoro tọn mẹ, na hunwhẹ kọmẹgán yọyọ he yin dide tọn lọ wutu.

Gbẹtọ susu gọna owhe kande-koatọ́n mẹvi de, wẹ gbleawu e whè gbau jẹ obá de mẹ to nujijọ lọ he jọ to nudi ogàn 7 whejai mẹ lọ whenu.

Ohọ̀ kande-konukunẹnẹ, kẹkẹ atọ̀n gọna nutindo he akuẹ yetọn sọ̀ naira livi susu lẹ wẹ yè sọ do miyọ́n ga.

To hodidọ de whenu to Sẹgbe, ponọ ayimatẹn Bauchi tọn lẹ dọ gbọn Hoyidọtọ yetọn, Ahmed Wakil dali dọ nugbo wẹ dọ nujijọ lọ jọ domọ.

Hosọ́ hodidọ lọ tọn wẹ "Anadenanutọ ponọ lẹ tọn degbe dọ dodinnanu kitokito ni bẹjẹeji, bo na avase sọta nuyiwa depope he gán fọ́n hunyanhunyan doté to Bogoro".

Wakil, he yin ogán ponọ lẹ tọn de, dọ dọ tlolo he linlin hunyanhunyan lọ tọn jẹ ponọ̀pá yetọn mẹ godo, ogbẹ́ ponọ Tactical team, Rapid Response Squad po Operation Restore Peace tọn lẹ po, yin didohlan lẹdo lọ mẹ nado hẹn jijọho gọwa.

E dọ dọ Anadenanutọ ponọ ayimatẹn lọ tọn, Aminu Alhassan, ko degbe dọ yé ni basi dodinnanu nado de nue fọ́n nujijọ lọ doté gba. Hoyidọtọ ponọ lẹ tọn lọ sọ dọdọ jijọho ko yin hinhẹn gọwa lẹdo lọ mẹ din, bosọ yidogọ dọ Ogán ponọ lẹ tọn lọ ko vẹvẹ na tomẹnu lọ lẹ dọ yé ni kuahun.

E dọmọ, "to azan fọntọ́ntọ, Lidosun owhe 2023 tọn, to nudi ogàn 7 whejai tọn mẹ, ponọ ayimatẹn Bauchi tọn lẹ tọn sè linlin gando hunyanhunyan he to yiyi to lẹdo Bogoro tọn mẹ to ayimatẹn lọ mẹ.

"Dodinnanu he jẹnukọn lẹ dohia dọ hùnwhẹ kọmẹgán yọyọ dide tọn to glètoho Sang tọn mẹ lọ tẹnmẹ wẹ hunyanhunyan lọ bẹ sọn, to Lẹdo Gandudu Dokọ̀ Bogoro tọn mẹ.

"Jọja he to adán ji he tindo yanwle he gbọnvo de lẹ fọngu sọta hùnwhẹ lọ. Gbọnmọ dali, yé jẹ awugblena tomẹnu homẹvọnọ lẹ ji, yé sọ fiọ ohọ̀ 64, kẹkẹ atọ̀n gọna nutindo he akuẹ yetọn sọ̀ Naira livi susu lẹ.

"Omẹ dopo, Apollos Danlami, owhe 70 mẹvi de, yin huhu bọ Naemiya Bature, dawe owhe 65 mẹvi de, yin awugblena to nujijọ lọ mẹ".

Wakil dọ dọ to alọnu din, ponọ lẹ to dudlu pé gbọn lẹdo he mẹ nulọ jọ te nado hẹn ẹn diun dọ jijọho tin.

E sọ yidogọ dọ vivẹnu lẹ ko to yinyin dido to alọnu na alọ̀ nido jẹ mẹhe dọ̀n nujijọ lọ doté lẹ go.

Asisa lẹ[jlado | jla asisado]

Gọẹ yi sọn "https://guw.wikinews.org/w/index.php?title=Gufọntọ_lẹ_hù_dawe_owhe_70_mẹvi_de_bo_sọ_fiọ_ohọ̀_kande_ko-nukunẹnẹ_to_Bauchi&oldid=16610"