Dawe de dohò na viyọnnu owhe 14 mẹvi de to Awọnlin
Oguzangbe, Nuwhàsun 2, 2023
Dawe owhe 24 mẹvi de, Jacob Ekene, yin wiwle to Yọnnuzangbe sọyi Ikoyi to fihe yè nọ gbeje whẹho ylanwiwa tọn lẹ pọ́n te na e dohò na viyọnnu owhe 14 mẹvi de to tayin etọn de to Amuwo Odofin, Awọnlin.
Ekene he yin wiwle na whẹho atọ̀n delẹ wutu, ailinlẹn ylankan, zanhẹmẹ gannu-gannu po awugble agbasa tọn, yin zizedo gànpamẹ gbọn Whẹdatọ P. E Nwaka dali to Whẹdatẹn he tin to Yaba, ayimatẹn Awọnlin tọn.
Ekene wa danu mọnkọ po họntọn etọn, Olamilekan Saidi po.
Nukunmọnu mítọn dọ dọ, whẹhùtọ lọ yi tayin viyọnnu lọ tọn de to azọ́nmẹ nado mọ wema NIN tọn etọn yi bọ nawe lọ dọna ẹn dọ, ni wa whégbè to azán atọ̀ntọ gbè nado mọ wema lọ yi.
To azan he gbè e yi tayin lọ sin whégbè, e ma mọ tayin lọ, viyọnnu pẹvi de wẹ e mọ, whenẹnu, e kanbiọ viyọnnu lọ dọ, tayin etọn lo, bọ viyọnnu lọ gblọn dọmọ, e ma ko gọ sọn azọ́nmẹ.
Na tayin lọ ma tin to whégbè wutu, Ekene gbọn yẹ̀kan enẹ mẹ nado zanhẹ viyọnnu owhe 14 mẹvi lọ gannu-gannu, enẹgodo, e sọ dọna viyọnnu lọ dọmọ, eyin e dọ nuhe jọ na mẹdepope, emi na hùi.
Sọn whenue gbọn Ekene ko wa danu mọnkọ wẹ e nọ yi owhé lọ gbè, whedelẹnu, e nọ yi họntọn etọn, Saidi sin azọ́nmẹ, mẹhe yin whẹsadokọna dọ e mọnukunnujẹ whẹho lọ mẹ pẹẹde.
To whenue tayin lọ doayi diọdo delẹ go to viyọnnu lọ go, e jẹ hokanse ji, to hokansemẹ lọ whenu viyọnnu lọ sawhẹdokọna Ekene dọ e mọnukunnujẹ nuhe wiwa emi mẹ, e ko sọ dọna emi dọ, whedepopenu he emi dọhó lọ na mẹdepope, e na hù emi po ohi po.
To whenue tayin lọ sè linlin lọ, e gọ na adi sinsinyẹn, enẹwutu, e plan viyọnnu lọ yi ponọpámẹ nado hẹn whẹhọ lọ zun yinyọnẹn na yé, enẹgodo, e plan viyọnnu lọ yi dotowhé na yé nido gbejepọ́n, whenẹnu wẹ yé mọdọ e ko mọhò.
Ponọ lẹ, whenue yé to dodinnanu basi do whẹho lọ ji, Ekene yin wiwle, ṣigba, họntọn etọn Saidi họ̀nyi whenue e sè dọ ponọ lẹ to dindin emi.
To whenue ponọ lẹ fó dodinnanu do whẹho lọ ji, yé sẹ́ Ekene do whẹnukọn na sẹ́nhẹngba etọn wutu.
Whẹyidọtọ Thomas Nurudeen dọmọ, ylanwiwa lọ jẹagọdo osẹ́n Section 411, 137, po 245 po to Osẹ́n Sẹ́nhẹngba ayimatẹn Awọnlin tọn, Naijilia, to 2015 tọn mẹ.
Ovẹ̀ mẹhe yin whẹsadokọna lọ tọn mayin alọkẹyi.
Whẹdatọ lọ jlo nado mọ viyọnnu jọja lọ ṣigba, yé dọna ẹn dọ, yé ko sẹ́ ovi lọ yiwhé na nuhe jọ wutu.
Nwaka degbe dọ owhẹ̀ mẹhe go yè venudo lọ ni yin sisẹdo Ikoyi Correctional Center na azan 30, to whenuena owhẹ̀ lọ yin sisẹ́do nukọn kakajẹ Nuwhàsun 25, 2023.
Asisa lẹ[jlado | jla asisado]
- Naomi Chima. "Man impregnates 14-year-old girl in Lagos" —Punch. May 2, 2023
- Kazeem Tunde. "Man Impregnates 14-year-old Girl In Lagos" —The Glitters. May 2, 2023