Dawe awuwhàntọ de fiọ ohọ̀ mẹyiwanna etọn dai tọn na gbemanọpọ wutu

Sẹgbe, Lidosun 9, 2023

Ponọ ayimatẹn Ogun tọn lẹ ko wle dawe owhe 43 mẹvi de, Hassan Yusuf, na e domiyọ́n owhé yọnnu mẹyiwanna etọn dai tọn, Busayọ Falọla.

Ohọ̀ lọ yin fifiọ mlẹnmlẹn, he tin to 127, Old Scholar Palace, aliho Igan tọn ji to Ago-Iwoye to gandudu dokọ Ijebu-North tọn to ayimatẹn lọ mẹ na mẹyiwanna etọn dai tọn lọ gbẹ nado gbọwhẹ hẹ wutu.

Ponọ-gán hodọdopọ azọ́nwhé tọn, SP Abimbola Oyeyemi, to hodidọ etọn de mẹ to Sibigbe, dọmọ, dawe lọ yin wiwle to whenue whétọ owhe 62 mẹvi he tindo owhé lọ jẹwhẹ̀ sunnu danuwatọ lọ tọn to tatọtẹnnọ ponọ Ago Iwoye tọn.

PPRO dọmọ, yọnnu whétọ lọ jẹwhẹ̀ dọmọ, emi sè awhágbe de to owhé lọ gbè to nudi ogan 1.15 zanhomẹ tọn to Oguzangbe, to whenue emi tọ́n jẹ gbangba, emi mọdọ owhé lọ ko ji miyọ́n bọ họ̀hayatọ lọ sọ yin súsú do ohọ̀ lọ mẹ.

E zindonukọn dọmọ, awuyiya mẹhe tin to owhé lọ gbè lẹ tọn wẹ zọ́n bọ họ̀hayatọ atọ̀n lọ lẹ do yin whinwhlẹngán, ṣigba owhé lọ fiọ mlẹnmlẹn.

"Sọgbẹ hẹ linlin he wa yin nina ponọ lẹ, DPO Ago Iwoye tọn, CSP Noah Adekanye deanana ponọ etọn lẹ yi nujijọ lọ tẹnmẹ fihe mẹhe nọ nọ owhé lọ gbè lẹ yinyiylọ do ponọpámẹ na hokansemẹ nado yọn mẹhe wa danu mọnkọ.

To hokansemẹ lọ whenu, dopo to họhayatọ lọ lẹ mẹ, Falọla Busayọ dọna ponọ lẹ dọ emi mọ mẹyiwanna etọn dai tọn, Yusuf Hassan to họ̀godo etọn, to nudi ogan 12.30 zanhomẹ tọn to azán lọ gbè.

E zindonukọn to hodidọ etọn mẹ dọmọ, obú di emi nado mọ ẹn to ogan enẹ mẹ, enẹ wẹ hẹn emi nado dawhá po ogbè lélé po bo họnyi mẹdevo sin họ̀mẹ.

"Ehe wẹ zọ́n bọ mẹdevo do tọ́n nado yọn nuhe Yusuf jlo na wa, tintọ́n whenu, miyọ́n wẹ to titọ́nsọ́n ohọ̀ Busayọ tọn mẹ.

"Podo nudọnamẹ lọ po, yè yangbé Yusuf tọn bosọ wle.

"E yigbe dọ emi wẹ fiọ ohọ̀ mẹyiwanna dai emitọn na emi ko tẹnpọn nado dọhógbo po e po ṣigba e ma kọngbedopọ, enẹwutu wẹ emi do họ̀ yovomin naira 500, bo kọnẹn do ohọ̀ lọ ji podọ gbọn fleṣenu biọ ohọ̀ lọ mẹ, bo wa domiyọ́n ẹ," dile hoyidọtọ ponọ lẹ tọn dọ do.

Oyeyemi dọmọ, devizọ́nwatọ Ponọ ayimatẹn lọ tọn, Frank Mba dọmọ, danuwatọ lọ ni yin zize yi na ogbẹ́ he nọ penukundo danuwatọ lẹ go he yin State Criminal Investigation Department na dodinnanu yinukọn dogọ.

Asisa lẹ

• Daud Olatunji. "Jealous man burns ex-lover’s apartment for shunning reunion". —Punch. April 9, 2023
• Christopher Oji. "Man arrested for setting ex-lover ablaze after quitting relationship". —The Sun. April 9, 2023