Azán dagbe lẹ to nukọn ja dile Ahọlu Aganọ Toniyọn 1 dotana azán 6tọ hunwhẹ owhe 5tọ etọn tọn
Sẹgbe, Alunlunsun 29, 2023
Nuwiwa azán ṣidopotọ to hùnwhẹ owhe atọ́n gandudu Ahọlu Aganọ tọn wá aime to Nigeria French Language Village fihe yin aṣọdona ganji nado basi wadotana daho hùnwhẹ lọ tọn po jonọ Ahọlu lẹ tọn yíyí te po. Ahọlu he wá nuwiwa lọ tẹnmẹ lẹ wẹ Akwẹnọ of Kwẹmẹ kingdom, Oba Friday Ololade Kosoko, Oniworo of Iworo Kingdom, Oba Alamu of Imore Apapa Kingdom, Ahọlu Ovitotode Toyi I, Sanọ of Kọga Kingdom, HRM. De Whenọ Ahọlu Mẹnu Toyi I, Akran of Badagry Kingdom, Ahọlu lẹ sọn ayimatẹn Osun tọn mẹ po ayimatẹn Oyo tọn mẹ po, azinponọ Igbonu lẹ tọn to Gbagli, Hon. Mobolaji Ogundenle he yin alọgọtọ vonọtaun na ayimatẹn-gán Babajide Olushola Sanwo-olu gando azọ́n vonọtaun lẹ go, he sọ yin azinponọ nuwiwa lọ tọn, po mẹhe to gántẹnmẹ devo lẹ po.
Mẹhe to gántẹnmẹ High chiefs, Honorary Chiefs, Ahọsi Aganọ tọn lẹ, Ahọvi Aganọ tọn lẹ, mẹsunnu Zacheous Hunpatin he yin azinponọ na wedegbẹ titobibasi tọn, Kabiyesi Owurolawa tele Awọnlin tọn, omẹ Ajara Agamathẹn tọn lẹ, họntọn lẹ po omẹ tangan devo lẹ po wẹ wá nuwatẹn lọ tẹnmẹ.
To hòkansemẹ kleun de mẹ hẹ hagbẹ Ogu General Assembly (OGA) tọn whẹpo nuwiwa lọ do bẹjẹeji, mẹsunnu Mẹwhenu Hosu he yin wekàntọ na ogbẹ́ lọ dọ nuhe e lẹn nado mọ to nuwatẹn lọ, he yin zedaga ogbè tọn, jọwamọnu lẹ po Gunnuvi lẹ po lẹdo aihọn pe dile Ahọlu Aganọ lọsu po omẹ devo lẹ taidi Silvester Hunjọ, Joel Yetọnyọn po Emmanuel Agọsu po ko yin nukọntọna po.
Mẹsunnu Fanu Johnson Ojo Dansu sọn ogbẹ́ OGA tọn lọsu zinnudo whẹhọ aṣa, oyin po gandudu Gunnugbeji lẹ tọn po taidi nuhe yin dandannu de dile e vẹ̀ Ahọlu he pò lẹ nado hopodona mẹhe ko to vivẹnudo lẹ na zedaga akọta Gunnu lẹ tọn.
Ahọlu Aganọ Toniyọn I po whédo etọn po, po ọmẹ tangan devo lẹ po hopódona ẹn to whenuena e sán akla yovo tọn nado basi ohiadonu owhe atọ́ntọ etọn tọn taidi Ahọlu.
Mọdopolọ Ahọlu lọ dopẹna linlinzọnwatọ lẹ, aihundatọ lẹ po mẹhe wá lẹ po na godonọnamẹ yetọn lẹ he whan Ahọsi lẹ po Ahọvi lẹ po nado dọ numọntolanmẹ yetọn lẹ gando hunwhẹ lọ go taidi ayajẹnu de dile yé biọ ogbẹ gaa na Ahọlu po gandudu etọn po.
Nọtẹn lọ yin hihọ-basina gbọn ponọ Awọnlin tọn lẹ, awhànfuntọ Naijilia 243 Batallion tọn po hihọ-basinamẹtọ devo lẹ po.