Ahọluzọ́nwatọ gbànnukunawe wẹ yin hùhù to azọ́nnu to owhe atọ́n gblamẹ wẹ ogbẹ FRSC tọn dọ

Sọn Wikilinlin

Tẹnigbe, Lidosun 24,2023

Azọ́nwatẹn he nọ penukundo hihọ Ali ji tọn go yedọ Federal Road Safety Corps dọ dọ ahọluzọnwatọ gbannukunawe wẹ hẹn ogbẹ yetọn bu to whenue ye tin to azọnnu to gblagbla owhe 2018 po 2022 po tọn ṣẹnṣẹn. Hoyidọtọ azọ́nwatẹn lọ tọn, Bisi Kazeem, wẹ hẹn nudọnamẹ ehe wa linlinhọsa mítọn to ahọluzangbe. Sọgbe hẹ nudọnamẹ lọ, omẹ atọ̀n yin huhu to 2018; omẹ ṣidopo hẹn ogbẹ yetọn bu to owhe 2019; omẹ ṣinẹnẹ to owhe 2020; omẹ atọ́n to owhe 2021 podọ omẹ enẹ to owhe 2022 mẹ.

Kazeem dọdọ ahọluzọnwatọ lọ lẹ ku na ‘‘yamakiananu hunkuntọ lẹ tọn.’’ To Abọ̀húsun, azan konukunatọ́n, owhe fọtọ́n donu awe po konukunawe po tọn, agbanbehun de hu ahọluzọnwatọ awe to Ikot-Ekpene to ali Aba tọn ji. Asidán lọ jọ na húnkuntọ lọ tọn to wezun ji bosọ to tintẹnpọn nado dapana odò he to aliho ji de wutu.

Mí sọ sè linlin to azan atọ̀ntọ Lidosun,owhe 2022 tọn, dọ jaguda delẹ hù azọ́nwatọ awè to Ezinifite to Lẹdo Gandudu Dokọ̀ Aguata tọn to ayimatẹn Anambra tọn mẹ. Jaguda lọ lẹ bọ osò do na azọ́nwatọ lọ lẹ poun dile yé to azọ́n yetọn wà to aliho he tọ́n sọn Igbo-Ikú yì Uga ji to lẹdo Ezinifite tọn mẹ to ayimatẹn lọ mẹ.

To 2021, azọ́nwatọ FRSC tọn awè wẹ kú to ayimatẹn Nasarawa tọn mẹ. Gbejizọ̀nlin ji wẹ azọ́nwatọ lọ lẹ te bo jei tito azọ́nplọnmẹ de tọn tẹnmẹ to FRSC Academy tọn to Udi.

To Ayidosun, 2020, hẹviosò jẹ azọ́nwatọ atọ̀n ji bọ yé kú to toll gate Ilese tọn he tin to Lẹdo Gandudu Dokọ̀ tọn Ijebu North East tọn to ayimatẹn Ogun tọn mẹ. Mí sè dọ lehe yé na wazọ́n yetọn do tọn to afọnnu sin tito basi wẹ yé te to azọ́nwatẹn yetọn bọ nulọ do jọ. Ogán FRSC tọn, Dauda Biu, ko dọhó sọta nuyiwa yamakinanu tọn húnkuntọ lẹ tọn he zọn bọ yé fọ́n bo to ogbẹ azọ́nwatọ hihọ aliji tọn lẹ tọn zedo owù mẹ.

To whenue e to hodọ gando nuhe sọgan yin wiwa nado pehẹ nuhahun ehe go, Anadenamẹtọ-gán Wehọmẹ húnkunkun po hihọ po tọn, Jide Owwtunmise, dọ dọ azọ́nwatọ FRSC tọn lẹ ni nọ dapana nado nọ zlọn jẹ aliji nado do mọto he to wezun ji lẹ te.

Asisa lẹ[jlado | jla asisado]

Gọẹ yi sọn "https://guw.wikinews.org/w/index.php?title=Ahọluzọ́nwatọ_gbànnukunawe_wẹ_yin_hùhù_to_azọ́nnu_to_owhe_atọ́n_gblamẹ_wẹ_ogbẹ_FRSC_tọn_dọ&oldid=17594"