Ahọlu Aganọ Toniyọn 1 zindonukọn po hunwhẹ owhe atọ́n etọn to ganzinpoji podo odẹ po na ahọludu etọn podọ Ajara Agamathen he yin otò etọn po
Oguzangbe, Alunlunsun 24, 2023
Nuwiwa azán tintan hunwhẹ owhe atọ́n gandudu Ahọlu Aganọ tọn bẹjẹeji podo odẹ po dile yẹwhenọ sinsẹngán tọn lẹ, malenu lẹ podo sinsẹn jọwamọ tọn lẹ po basi ovẹse do ahọlu lọ tamẹ.
Yẹwhenọ Banjoko na ayidonugo walọ dagbe ahọlu lọ tọn podo whẹdida dodo he tin to gandudu etọn glọ po sọn owhe 2000 ehe e ko tin to ganzinpo ji taidi Gbétatò-gán kakajẹ whenuena e yin didiọ do ahọlu tẹnmẹ. Ahọlu lọ ko tindo nuyiwadomẹji dagbe do gbẹtọ lẹ podo otovi etọn lẹ po ji ehe yin nuhe whan gbẹtọgun lẹ nado jihàn pipa tọn lẹ hlaẹn. Sinsẹn podo aṣa voovo lẹ po wẹ wa hunwhẹ lọ tẹnmẹ nado nọgodona nuwiwa lọ bosọ na pipa lẹ na gandudomẹji dagbe etọn wutu.
To ohòkansemẹ de mẹ, hodidọ podo numimọ lẹ po wẹ dohia dọ Ahọlu Aganọ ko yidogọna ayajẹ podo jideji otò etọn tọn po podo mẹhe to gandudu etọn glọ lẹ tọn po. Nawe he ma mọ ovi ji na owhe 31 de dọdọ mahopọna nugomape emi tọn nado ji ovi, ahọlu lọ podo gandudu etọn po ma jo emi do mọdopolọ yé do vivẹnu taun kakajẹ whenuena emi do tindo ovi emi tọn titi.
Ahọlu Aganọ sọ dọ gando wadotana etọn go to owhe atọ́n gblamẹ ehe e jẹ gandu ji taidi Ahọlu dọ gandudu emi tọn ko de agbàgogan yọyọ lẹ po Mẹtogantẹnmẹ lẹ po bo sọ gọalọna wehọmẹvi lẹ po mẹhe ma do azọ́n lẹ po nado mọ azọn, e sọ dọdọ to owhe he ja lẹ mẹ emi to awuwle nado gbà họ̀nmẹ daho devo na Ahọluduta Agamadẹn tọn mọdopolọ nọtẹn họ̀nmẹ lọ tọn ko tin to ai.