Nujijọ awublanamẹ tọn de to azan Sallah tọn gbe: omẹ dopo ku, bọ omẹ atọ̀n gbleawu to asidan kẹkẹ tọn de he jọ to Kwara

Sibigbe, Lidosun 22, 2023

Nujijọ awublanamẹ tọn de jọ to Ahọluzangbe, to whenue kẹkẹnọ de he bẹ omẹ atọ̀n dli biọ mọto de mẹ bo kú bọ omẹ atọ̀n he e bẹ lẹ lọsu gbleawu sinsinyẹn.

Asidán lọ jọ to Ilorin he yin tatọ-tònọ ayimatẹn Kwara tọn mẹ, podọ e bẹ omẹ ẹnẹ hẹn do zòkẹkẹ ji to azán Eid- el- Fitr tọn gbe bo lẹkọ sọn fihe yè nọ hodẹ te.

Mẹhe mọ nujijọ lọ de dọna linlinhọsá The PUNCH tọn dọ atọ̀n to yé omẹ he tin to kẹkẹ lọ ji to whenue yé hozà na mọto lọ mẹ lẹ wẹ gbleawu sinsinyẹn.

Mí sè dọ fihe yè nọ hodẹ Eid tọn te wẹ yé lẹkọ sọn bọ asidán lọ do jọ to lẹdo Balogun Fulani tọn mẹ, to Lẹdo Gandudu Dokọ̀ tọn Ilorin South tọn mẹ to ayimatẹn Kwara tọn mẹ.

Suraju poun wẹ yè dọ dọ mẹhe kú lọ nọ yin, podọ mí sè dọ owhé Alamo tọn gbe to Okelele, Ilorin, wẹ e wá sọn.

Mí sè dọ dotowhe de wẹ Suraju wá ku te, yèdọ fihe e yin zize kudaa-gbẹ̀daa sọyi nado yin nukunpedego.

E ko yin didi do ṣiọditẹn Malenu lẹ tọn he tin to lẹdo Osere tọn mẹ to Ilorin.

Awè to mẹhe gbleawu lọ lẹ mẹ ko yin zize sọyi Dotowhe Daho Ayimatẹn lọ tọn to Surulere, Ilorin, podọ omẹ atọ̀ntọ uwọ ko yin zize yì húdọntọ-whé to lẹdo Dada tọn mẹ nado yin nukúnpedego.

Mẹsusu wẹ gọ́ owhé mẹhe ku lọ tọn gbe nado miọnhomẹna whẹndo etọn.

To whenue yè dọhó dopọ hẹ Ogán Azọ́nwatẹn Tohọluduta tọn he nọ Penukúndo Hihọ Aliji tọn go to Kwara, Fredrick Ogidan, e dọ dọ linlin nujijọ lọ tọn ma ko jẹ azọ́nwhe emi tọn mẹ gba.

"N'na dindona podọ eyin vlavo onú mọnkọtọn jọ janwẹ, N'na dike mì ni sè", wẹ e dọ.

Asisa lẹ

• Tunde Oyekola. "Sallah day tragedy: One dies, three injured in Kwara motorbike crash." — Punch. April 21, 2023
• Adekunle Jimoh. "One dead, three injured in Kwara Sallah road crash." — The Nation. April 21, 2023